'ಫಲ'

ಅವನು 'ಮನಸ್ಸಿಗೆ' ಹೇಳಿದ-

“ಪಕ್ಕದ ಮನೆಯಲ್ಲಿ ಬೆಳೆದು ನಿಂತ ಸಸ್ಯದ ‘ಫಲ’ವನ್ನು ಭುಂಜಿಸುವುದು ಸುಲಭ ಸಾಧ್ಯ!
ನಾನು ನನ್ನ ಮನೆಯಲ್ಲಿ ಸಸಿ ನೆಟ್ಟು, ಅದಕ್ಕೆ ನೀರೆರೆದು, ಹೊಂದುವ ಗೊಬ್ಬರವ ಹಾಕಿ, ಯಾವ ಹಾನಿಯೂ ಆಗದಂತೆ ಕಣ್ಣಲ್ಲಿ ಕಣ್ಣಿಟ್ಟು ನೋಡಿಕೊಳ್ಳುತ್ತಾ ವರ್ಷ ಗಟ್ಟಲೆ ಕಾದು ಕುಂತರೂ ಅದು ಬಿಡುವ ಫಲ ಸಿಹಿಯೋ, ಸಪ್ಪೆಯೋ, ನೀರಸವೋ ಯಾರು ಬಲ್ಲರು?
ಬದಲಿಗೆ ಪಕ್ಕದ ಮನೆಯಲ್ಲಿ ಪರಿಶ್ರಮದ ‘ಫಲ’ ತೂಗುತ್ತಿರುವುದು ಕಾಣುತ್ತಿದೆ! ಅದನ್ನು ಅವರಿವರ ಬಳಿ ಕೇಳಿ, ರುಚಿಕರವೋ, ಕೊಳ್ಳಲು ಯೋಗ್ಯವೋ ಎಂದು ವಿಚಾರಿಸಿ ಇಂತಿಷ್ಟು ಕಾಸು ಕೊಟ್ಟರೆ ಮುಗಿಯಿತು!”

ಮನಸ್ಸೆಂದಿತು-

“ಮಿತ್ರಾ, ಸತ್ಯ ಸತ್ಯ. ಅದಕ್ಕೆಂದೇ ಹಲವು ಭಾಂಧವರು ಬೆಳೆದು ನಿಂತದ್ದಕ್ಕೆ ಕೈ ಹಾಕುವುದರಲ್ಲೇ ಮಗ್ನರಾಗಿರುವರು!
ತಮ್ಮ ‘ಫಲ’ವನ್ನು ಪಡೆಯಲು ಗಿಡ ಬೆಳೆಸುವುದರಲ್ಲಿರುವ ಆನಂದವನ್ನು ಅನುಭವಿಸುವರಾಗಿರಬೇಕು! ‘ಫಲ’ದ ಮೇಲೆ ಕಣ್ಣಿಟ್ಟವರಲ್ಲ! ಚಿಂತಿಸು....”